Skóla­yfir­­völd og for­eldrar þurfi að taka á matar­­­venjum barna

Sálfræðingurinn og þjálfarinn Ragnhildur Þórðardóttir, sem flestir þekkja sem Röggu Nagla, segir ríka ástæðu til þess að vekja athygli á offitu barna á Íslandi. Íslendingar þurfi að horfast í augu við þær lausnir sem séu fyrir hendi svo börnum líði betur í eigin skinni og eigi í heilbrigðu sambandi við mat.

Í færslu á Facebook-síðu sinni setur Ragga fram nokkrar lausnir sem hægt sé að taka til skoðunar til þess að sporna við óheilbrigðum matarvenjum. Hún ítrekar þó að mikilvægast sé að skoða hvernig börn borði, frekar en hvað þau borði.

Mikil umræða hefur skapast um offitu hjá íslenskum börnum eftir að málið var tekið fyrir í fréttaskýringarþættinum Kompás. Þar kom fram að íslensk börn hafa aldrei verið jafn þung og að samkvæmt nýjustu mælingum sé fjórðungur íslenskra grunnskólabarna í ofþyngd. 

Sjá einnig: Þúsundir íslenskra barna með offitu: „Þessar tölur slá mann niður“

„Ef börn eiga að skófla niður matnum á kortéri þá velja þau mat sem uppfyllir þau skilyrði eins og samlokur, snúða, skinkuhorn og ostaslaufur. Mat sem þau geta mokað upp í túlann með höndunum á innan við fimm og málið er dautt,“ skrifar Ragga og bætir við að í þessu samhengi megi draga skólayfirvöld og foreldra til ábyrgðar.

Hún segir endurteknar máltíðir á hlaupum eða í kapphlaupi við klukkuna valda því að líkaminn sé ekki klár í að melta fæðuna. Blóðið sé enn í útlimum sem þýði minna blóðflæði í magann og slíkt geti valdið meltingartruflunum til lengri tíma.

„Hámað í sófanum í kaffistofunni yfir símanum og hausinn er ekki með í partýinu í munninum því hann er á fullu að skoða myndir á instagram. Það verður engin upplifun af matnum. Engin nautn. Engin tenging. Engin skráning á máltíðinni í minninu.“

Allir elska mat en fæstir borða þannig 

Ragga bendir á að rannsóknir sýni fram á það að þegar fjölskyldur borði saman og sitji saman þar til matartíma sé lokið séu grennri en aðrar fjölskyldur þar sem fjölskyldumeðlimir fari frá borðinu þegar þeir hafa lokið sér af. Núvitund sé líka hjálpleg í þessu samhengi og segir hún fólk sem nærast í núvitund fara að velja hollari kosti.

„Allir elska að borða. Allir elska mat. Enn fæstir borða eins og þeir elski mat.“

Þær lausnir sem Ragga setur fram snúa að matartímanum sjálfum. Fyrsta lausnin sé að útrýma sjónvarpsglápi og símahangsi á meðan matartíma stendur enda þurfi einbeitingin að vera á máltíðina sjálfa en ekki annað afþreyingarefni.

„Við viljum að heilinn sé í partýinu sem er í munninum en ekki límdur á hvað er að gerast á skjánum á Jútjúb eða Instagramm,“ skrifar Ragga.

Næstu lausnir miða að frekari samvinnu foreldra og barna þegar kemur að matargerðinni og matartímanum sjálfum. Það að foreldrar leyfi börnum að taka þátt í eldamennskunni, brýni fyrir þeim að taka sér góðan tíma í máltíðina og hvetji þau til þess að velja fjölbreyttara mataræði geti skipt sköpum.

„Því ást er að veita óskipta athygli og ef við kennum unglingum að borða hægar, í fullkominni ró og með öll skilningarvit galopin verða þau sáttari í sálinni eftir hverja máltíð sem minnkar líkur á árás á nammibarinn í Hagkaup í næstu frímínútum.“

Pistil Röggu má lesa í heild sinni hér að neðan.