87 ára kona neitar að taka þátt í „fasteignabraski“

Kaupandi íbúðar að Árskógum hefur hafnað sáttartilboði Félags eldri borgara um að þeim verði gefinn afsláttur af aukagreiðslu sem krafist var fyrir íbúðirnar. Lögmenn tveggja kaupenda fóru fram á að þeir fengju íbúðirnar afhentar nú þegar í Héraðsdómi Reykjavíkur í morgun þar sem málið var þingfest.

Lögmaður Félags eldri borgara segir félagið ekki hafa lyklavöld yfir íbúðunum og fór fram á vikufrest til að koma með varnir í málinu.

Stjórn Félags eldri borgara kynnti sáttartilboð sitt til kaupenda íbúða fyrir aldraða að Árskógum í gær þar sem fram kom að krafa félagsins um að þeir greiddu alls 400 milljóna aukagreiðslu fyrir íbúðirnar vegna aukakostnaðar sem varð til vegna vanáætluna bygginganefndar félagsins yrði lækkuð í 252 milljónir króna.

Með þessu lækkuðu aukakröfurnar úr 4,5-7 milljónum króna í rúmar 2,5-4 milljónir króna á hverja íbúð.

Nú þegar hafa 26 af 65 skrifað undir skilmálabreytinguna.

Samkvæmt upplýsingum fréttastofu hitti Félag eldri borgara þrjá kaupendur í morgun og kynnti þeim nýtt sáttatilboð og var tóninn hjá kaupendunum mun jákvæðari en áður þó ekki hafi verið skrifað undir í morgun.

Lögmenn tveggja kaupenda segja að umbjóðendur sínir telji að upphaflegur kaupsamningur eigi að gilda og kröfðust í Héraðsdómi Reykjavíkur í morgun að Félag eldri borgara stæði við þá samninga og afhenti lykla af íbúðum þeirra.

Sigurður Kári Kristjánsson er lögmaður annars kaupandans sem er 87 ára gömul kona.

„Félagið hefur sjálft lýst því yfir að það er ekki í neinum rétti til að krefja hana um nokkrar milljónir umfram það sem samið hefur verið um. Þó svo að það sé afsláttur af ofgreiðslukröfunni þá er sú krafa alveg jafn ólögmæt og upphafleg krafa“ segir Sigurður Kári.

Sigurður Kári segir umbjóðanda sinn á götunni og þurfi að fá íbúðina sína afhenta strax.

„Það væri nú svona mannlegri áferð á viðbrögðum félagsins ef það myndi afhenda íbúðirnar strax. Ef að það telur sig svo eiga rétt á aukagreiðslum frá mínum umbjóðanda að sækja þá greiðslu í stað þess að neita mínum umbjóðanda að afhenda íbúðirnar eftir að kaupsamningsgreiðslur hafa farið fram,“ segir Sigurður.

Fram hefur komið að Félag eldri borgara sé tilbúið að breyta skilmálum íbúðanna ef kaupendur samþykkja að greiða aukalega þannig að þeir megi selja íbúðirnar á markaðsverði þegar þeir selji í stað kostnaðarverðs eins og áður hafði verið samið um. Sigurður Kári segir að þetta skipti ekki máli fyrir sinn umbjóðanda. 

„Minn umbjóðandi er 87 ára gömul kona og ég fæ ekki séð að hún ætli að taka þátt í einhverju fasteignabraski í kjölfar þessara kaupa. Hún vill bara fá að flytja þarna inn og búið,“ segir Sigurður Kári. 

Málfutningur Sigrúnar Ingibjargar Gísladóttur lögmanns var sambærilegur hún sagði að sinn umbjóðandi vildi fá íbúðina afhenta nú þegar.

„Mínir umbjóðendur eru á hrakhólum. Kaupsamningurinn er bindandi og það ber að afhenda eignina og einhverjar mögulegar sáttir um verð ef kaupendur kjósa að greiða umfram verð þá er það bara eitthvað sem á að semja um síðar það á ekki að hafa áhrif á afhendingu eignarinnar,“ segir Sigrún.

Ekki með lyklavöld

Daði Bjarnason hæstaréttarlögmaður er verjandi Félags eldri borgara í málinu. Hann bað við þingfestinguna í morgun um frest til að koma við vörnum og var gefinn vikufrestur til þess.

„Það er ákveðinn ómögleiki til staðar því minn umbjóðandi er ekki með lyklavöld yfir íbúðunum heldur verktakinn og svo fer fram ákveðið hagsmunamat. Þarna eru heildarhagsmunir, það þarf að gæta jafnræðis. Það er ekki hægt að hleypa sumum inn bara á verðinu sem kom  fram í kaupsamningi. Það verður að skoða þetta í samhengi við þann kostnað sem þarna er að baki og hvernig hann á að dreifast“ segir Daði.