Útibússtjóri í tíu mánaða fangelsi fyrir níu milljóna fjárdrátt

Fyrrverandi útibússtjóri Sparisjóðsins á Suðurlandi var í Héraðsdómi Suðurlands þann 28. febrúar síðastliðinn dæmdur í tíu mánaða skilorðsbundið fangelsi fyrir fjárdrátt. Manninum var jafnframt gert að greiða Landsbankanum, sem tók yfir eignir og skuldir Sparisjóðsins, bætur að fjárhæð samtals 9.368.000 króna.

Maðurinn var dæmdur fyrir að hafa í starfi sínu frá 2011 til 2014 ýmist millifært sjálfur eða látið millifæra peninga af reikningum Sparisjóðsins og viðskiptamanna hans yfir á eigin reikninga, eða reikninga annarra í eigin þágu. Um var að ræða þrettán tilvik, samtals að fjárhæð 9.338.000 króna.

Maðurinn viðurkenndi skýlaust að hafa gerst sekur um þá háttsemi sem honum var gefið að sök í ákæru og einkaréttarkröfur um bótaskyldu og fjárhæð krafnanna. Við ákvörðun refsingar þótti rétt að líta til þess að rannsókn málsins hafi dregist verulega. Ekkert bendi þó til þess ákærða verði kennt um framangreindan drátt á rannsókn málsins enda hafi hann frá upphafi rannsóknar verið samvinnufús og játað brot sín.

Var manninum gert að reiða sakarkostnað samtals 383.910 krónur og Landsbankanum hf. bætur að fjárhæð 9.368.000 krónur. Þá var honum gert að greiða Landsbankanum hf. 334.000 krónur í málskostnað.