„Verður að stöðva þessa perverta sem telja sig guðsgjöf til kvenna“

„Það er góð spurning. Af hverju þetta hefur ekki komið fram í fjölmiðlum í öll þessi ár? Fjöldi manna var vitni að framferði karlsins, og hann misnotaði skólasystur okkar,“ segir Sigríður Hulda Richards í samtali við Vísi. Hún starfar á endurhæfingarstöð fyrir heilaskaðað fólk í Kaupmannahöfn.

Jón Baldvin Hannibalsson, fyrrverandi utanríkisráðherra og sendiherra, hefur verið til umfjöllunar undanfarna daga en hann hefur verið borinn þungum sökum um kynferðislega áreitni. Sigríður Hulda segir að; það verði að stöðva þessa perverta sem telja sig guðsgjöf til kvenna.

„Ég er vinkona Aldísar [dóttur Jóns] og hef stutt hana í gegnum árin. Mér hefur líka alltaf þótt vænt um Bryndísi [eiginkonu Jóns], og sennilega af virðingu við hana ekki haft mig í frammi. En nú er kominn tími til að ljúka þessari þöggun um hvernig Jón Baldvin er í raun og veru. Mér hefur þótt erfitt að horfa á hann njóta virðingar í íslensku samfélagi.“

Sigríður Hulda er meðlimur í Metoo-hópi þar sem frásagnir af samskiptum kvenna við Jón Baldvin eru sagðar. Þar eru nú 365 meðlimir. Sigríður Hulda sendi Vísi sína sögu sem snýr að framferði Jóns Baldvins en hann var skólameistari við Menntaskólann á Ísafirði á árunum 1975 til 1979. Stundin hefur einnig sagt af þessari frásögn en svo virðist sem Jón Baldvin hafi gengið afar grimmilega fram í kynferðislegum tilburðum gagnvart nemendum skólans.

„Ég var nemandi í Menntaskólanum á Ísafirði 1975-1979. Þetta gerðist þegar bekkurinn minn var að Dimittera vorið 1979. Ég hafði væntingar um skemmtilegan dag, 4ja ára nám var að baki, upplestrarfrí framundan og eftirvæntingar um alveg nýja framtíð framundan.“ Þannig hefst frásögn Sigríðar. Frásögnin, sem er afar skilmerkileg, er á þessa leið en millifyrirsagnir eru Vísis:

Skólameistari vel við skál

„Dagurinn hófst eins og hefðin bauð, hver bekkur hittist snemma morguns hjá sínum umsjónarkennara þar sem boðið var upp á morgunmat. Síðan var farið í skólann og kennsla trufluð í tímum hjá yngri bekkingum. Í hádeginu var borðaður 3ja rétta hádegisverður á heimavistinni og svo var haldið í sjóferð á litlum fiskibát til Súðavíkur.“

Í Súðavík var okkur boðið upp á kaffihlaðborð á bryggjunni en bæði sveitarstjóri og kona hans voru fyrrverandi nemendur í MÍ. Á siglingunni frá Ísafirði til Súðavíkur bar mikið á því að skólameistari og flestir kennarar voru orðnir vel við skál.

Skólameistari hékk í reiðanum og þrumaði ræður yfir okkur verðandi stúdentum, það voru 2 sjómenn um borð á bátnum og þeir voru orðnir verulega áhyggjufullir yfir þessu háttalagi skólameistara. Ef hann félli fyrir borð þá voru þeir í slæmum málum tryggingalega séð, þar sem það voru of margar manneskjur um borð í þessum litla fiskibát.

Ræðu- og góðglaður Jón Baldvin

Það vakti undrun mína, að skólameistari og fleiri kennarar voru orðnir haugadrukknir svona rétt eftir hádegið, alkóhólneysla nemenda var annars bönnuð á öllum skólaskemmtunum, þó var leyfilegt fyrir útskriftarstúdenta að drekka alkóhól þennan dag, ég man þó ekki eftir að nemendur væru drukknir um borð í bátnum.

Það var ekki meiningin að Dimisson ætti að fjalla um fyllierí kennara, aftur á móti átti þetta að vera dagur komandi stúdenta sem voru að kveðja skólann. Á bryggjunni í Súðavík klifraði skólameistari oftar en einu sinni upp á dúkað veisluborðið og stóð innan um kökur og trakteringar því hann hafði ægilega þörf á að þruma ræður yfir nemendum.

Ræðurnar voru mest volapyk, margar voru um pólitík. Dagurinn fór að verða svolítið dapurlegur fyrir nemendur þegar þarna var komið við sögu.

Jón Baldvin alsnakinn í sundi meðal nemenda

Frá Súðavík var siglt til Bolungarvíkur, þar var búið að opna sundlaugina sérstaklega fyrir okkur, svo við gætum farið í bað og skipt um föt fyrir veisluna, sem átti að hefjast um kvöldið heima hjá foreldrum eins af bekkjarfélaganum. Skólameistari var ekki eins mikið að tala yfir hausamótunum á okkur og þegar við sigldum til Súðavíkur. Aftur á móti var hann byrjaður að sigta nokkrar af okkur út, reyna að fá mig og fleiri á eintal við sig og káfa á okkur.

Ég forðaðist fljótt að vera ein með honum. Þegar ég og skólasystur mínar vorum nýkomnar út í laugina í Bolungarvík, þá stökk JBH allsnakinn út í laugina. Mér dauðbrá, allir vissu að sund væri á prógramminu og fólk hafði sundföt með sér.

Þessi nakti maður kom syndandi í áttina til okkar og við vorum allar í sjokki að ég held, allavega ég.

Þessu var bjargað af einum af þeim kennurum sem ekki var haugafullur, hann stökk upp úr lauginni, og fór í föt og bauð JBH sundskýluna sína og fékk skólameistara upp úr lauginni og inn í búningsklefann.

Jón færir sig upp á skaftið

Við stelpurnar gátum andað aðeins léttar. Þetta atvik fannst mér fyndið þá, því þessi kennari var pínulítill að stærð miðað við JBH og ég hugsaði hvort það væri mögulegt fyrir skólameistara að komast í þessa pínulitlu sundskýlu.

Það leið ekki á löngu áður en skólameistari í pínulítilli sundskýlu hoppaði út í laugina aftur, með radarinn beint á stelpurnar.

Hann byrjaði að strjúka á mér brjóstin og lendar, sem var afar óþægilegt og raunar mjög fráhrindandi svo ég stökk upp úr sundlauginni og fór í heita pottinn.

Þá byrjaði skólameistari að elta aðrar stelpur, sem endaði með að við flúðum upp úr sundlauginni hver af annarri og fórum í heita pottinn.

Leitaði á nemendur

Þaðan sá ég að skólameistari uppgötvaði að allt kvenkyns var í heita pottinum. Hann kom fljúgandi þangað. Við stukkum allar upp úr heita pottinum um leið. Ég fór beint í búningsherbergið og klæddi mig í veislufötin fyrir kvöldið.

Ég man að ég var í sjokki yfir kynferðislegri hegðun skólameistara og hugsaði með mér, hvað kemur til að þessi karl haldi að hann sé guðsgjöf fyrir allar konur. Hann var á aldur við pabba minn, og ungar stúlkur hafa ekki áhuga á gömlum körlum.

Á eftir gengum við frá sundlauginni í hópum að húsi því sem veislan átti að fara fram. JBH hékk í mér á leiðinni frá sundlauginni, leitaði kynferðislega á mig og fór með blautlegar vísur (gamlar klámvísur), sem mér fannst óþægilegt og fráhrindandi.

Dagurinn algerlega eyðilagður

Þessi kynferðislega áreitni stoppaði ekki og JBH hélt áfram kynferðislegu áreiti við mig í veislunni líka. Þáverandi kærasti minn kom í veisluna um kvöldið og varð vitni að hegðun JBH við mig. Hann varð mjög reiður, ég man ekki lengur nákvæmlega hvað hann sagði við Jón, en minn dagur var eyðilagður og þetta var allt saman mjög óþægilegt. 

Það voru fleiri stelpur en ég í bekknum sem lentum í kynferðislegri áreitni frá hendi JBH þennan dag. Ég veit allavega um eina aðra. Það þarf að stoppa svona perverta, sem halda að þeir séu guðsgjöf fyrir ungar stelpur.“