Bílbelti hefði bjargað lífi

Akstur með hjólhýsi í of miklum vindi og skortur á notkun öryggisbeltis olli því að 68 ára karlmaður lést í bílslysi skammt frá Freysnesi í Skaftafelli í júní 2017. Þetta er álit rannsóknarnefndar samgönguslysa (RNSA).

Slysið varð með þeim hætti að bifreið með hjólhýsi var ekið austur þjóðveg eitt er vindur var um 15 metrar á sekúndu en tvöfalt meiri í hviðum. Hjólhýsið sveiflaðist til og valt út af. Bifreiðin fylgdi og kastaðist maðurinn úr bílnum og lést.

Rannsókn sýndi að maðurinn hefði ekki verið í belti. Skemmdir á bílnum voru litlar og telur nefndin að sennilega hefði ekki hlotist bani af hefði belti verið notað. Nefndin beinir þeim tilmælum til ökumanna að nota belti og fylgjast með veðurviðvörunum.