Skattar lækki á getnaðarvarnir og tíðavörur

Tólf þingmenn standa að frumvarpi sem kveður á um að allar tegundir getnaðarvarna, sem og einnota og margnota tíðavörur, falli í lægra þrep virðisaukaskattsins. Vörurnar myndu þá bera 11 prósent virðisaukaskatt en í dag er skatturinn á þær 24 prósent.

Í frumvarpinu segir að markmið þess sé að stuðla að bættri lýðheilsu með því að draga úr kostnaði vegna nauðsynlegra hreinlætisvara, ásamt því að jafna aðstöðumun notanda mismunandi forma getnaðarvarna.

Verði frumvarpið að lögum muni Ísland færast nær þeirri þróun sem hefur orðið í öðrum ríkjum með tilliti til aðgengis að nauðsynlegum hreinlætisvörum og getnaðarvörnum á undanförnum árum.

Flutningsmennirnir tólf, þau Þórhildur Sunna Ævarsdóttir, Albertína Friðbjörg Elíasdóttir, Anna Kolbrún Árnadóttir, Ágúst Ólafur Ágústsson, Birgir Þórarinsson, Guðmundur Ingi Kristinsson, Halldóra Mogensen, Helga Vala Helgadóttir, Helgi Hrafn Gunnarsson, Jón Þór Ólafsson, Olga Margrét Cilia og Smári McCarthy, áætla að tekjutap ríkisjóðs vegna breytinganna muni nema um 43 milljónum á ári.

„Á móti skilar bætt lýðheilsa sparnaði í heilbrigðiskerfinu,“ segir í frumvarpinu.

Þetta er ekki í fyrsta sinn sem sambærilegt frumvarp hefur verið lagt fram. Það var til að mynda gert á síðasta þingi, sem og á þingi áranna 2014-15.