Best að selja í október

Í nýjustu Hagsjá Landsbankans eru skoðuð fasteignaviðskipti eftir mánuðum frá árinu 2003 til ársins 2017. Í ljós kemur að október er sá mánuður þar sem flest fasteignaviðskipti ganga í gegn. Þar á eftir kemur marsmánuður en í kjölfar hans koma september og nóvember. Landinn virðist því helst vera í kauphugleiðingum á haustin.

Janúar sker sig úr sem mánuðurinn þar sem minnst viðskipti eru með fasteignir en þau eru fjórðungi færri en í meðalmánuðinum. Viðskipti eru einnig undir meðaltali í bæði desember og febrúar. Vetrarmánuðirnir virðast því síst vænlegir til sölu.

Þessar niðurstöður mætti því túlka, heldur frjálslega, á þann hátt að best sé að setja eignina á sölu í kring um mánaðarmót ágústs og septembers. Hafi hún þó hins vegar ekki selst áður en desember gengur í garð er hætt við vetrarharðindum.