Mælast til þess að Netanyahu verði ákærður

Lögreglan í Ísrael hefur mælst til þess að Benjamin Netanyahu, forsætisráðherra Ísrael, verði ákærður vegna ásakana um mútur.

Greint er frá þessu á vef fréttastofu breska ríkísútvarpsins BBC en þar segir að lögreglan hafi yfirheyrt Netanyahu fyrir mánuði síðan vegna rannsóknar á ásökunum um spillingu.

Netanyahu sagði við það tilefni að ekkert myndi koma út úr þeirri rannsókn því það væri ekkert að baki þeim ásökunum.

BBC hefur eftir fjölmiðlum í Ísrael að lögreglan þar í landi muni tilkynna að nægar sannanir séu fyrir hendi til að ákæra Netanyahu.

Í einu málinu er forsætisráðherrann sakaður um að hafa beðið útgefanda ísrelsks dagblaðs um jákvæða umfjöllun í staðinn fyrir að hjálp við að styrkja stöðu útgefandans gagnvart samkeppnisaðila.

Í hinu málinu er Netanyahu sagður hafa fengið gjafir að andvirði 100 þúsund dollara, sem nemur um 10 milljónum íslenskra króna, frá ísraelska Hollywood-milljarðamæringnum Arnon Milchan og öðrum stuðningsmönnum.

Netanyahu hefur neitað báðum þessum ásökunum.

Ákvörðunin um það hvort Netanyahu verður ákærður er í höndum embættis ríkissaksóknara í Ísrael.