Slökkviliðsmenn gagnrýna Sprengjugengið í þætti Ævars vísindamanns

Slökkviliðsmenn hjá Slökkviliði Vestmannaeyja eru ekki ánægðir með eitt innslagið í annars fræðandi og skemmtilegum þætti Ævars vísindamanns á RÚV en í stöðuuppfærslu á Facebooksíðu slökkviliðsins gagnrýndu þeir „Sprengjugengið“ svokallaða frá Háskóla Íslands. Þátturinn reyndist gamall og var hann endursýndur í dag. Ævar Þór Benediktsson er þakklátur fyrir góða og réttmæta ábendingu.

Í þáttinn mættu tvær ungar konur frá Sprengjugengi Háskóla Íslands. Þær bleyttu í bómull með eldfimum vökva og kveiktu í með þeim afleiðingum að talsverður eldur skapaðist innandyra.

Á Facebooksíðu Slökkviliðs Vestmannaeyja er varað við því að börnum sé kennt að fikta með eld og eldfim efni og þá er það auk þess gagnrýnt að konurnar hafi ekki haft sýnilegar varúðarráðstafanir eins og eldvarnateppi og slökkvitæki. Í stöðuuppfærslunni segir einnig að betur hefði farið á að vara börnin við því að gera þetta heima hjá sér.

Stöðuuppfærslan endar á því að þættirnir Ævars vísindamanns séu bæði fræðandi og skemmtilegir en að þeir vilji ekki að innslag á borð við þetta sé haft fyrir börnum í skipulagðri barnadagskrá. Það bjóði hættunni heim.

Jón Pétursson, slökkviliðs og sjúkraflutningamaður hjá Slökkviliði höfuðborgarsvæðis og formaður fagdeildar slökkviliðsmanna innan Landssambands slökkviliðs og sjúkraflutningamanna, segir í samtali við Vísi að hann hafi horft á þáttinn í heild sinni og þótt hann sérlega fræðandi og skemmtilegur.

„Við erum nýbúnir að horfa á allan þáttinn og þátturinn sem slíkur er mjög skemmtilegur. Umfjöllunarefni mjög fræðandi og skemmtilegt en þetta eina tiltekna atriði finnst mér slæmt og nú tala ég fyrir mig. Ég tala bara sem slökkviliðsmaður, búinn að vera í starfinu í tæp þrjátíu og fjögur ár og sinni líka forvarnarfræðslu og þetta er ekki gott innlegg,“ segir Jón sem brýnir fyrir börnum að allt fikt með eld sé varhugavert.

Ævar Þór Benediktsson sagði í samtali við Vísi að um væri að ræða gamlan þátt. “Þetta er þáttur sem er tveggja ára gamall eða eitthvað svoleiðis og ég sá bara í morgun að það var verið að endursýna hann. Þetta er bara algjörlega satt og rétt,“ segir Ævar sem þakkar fyrir góða og réttmæta ábendingu slökkviliðsmannanna.

„Þegar við tökum upp erum við að sjálfsögðu með öll öryggistæki innan handar og það eru okkar mistök að hafa þau ekki í mynd og að sjálfsögðu á að fara varlega og ég þakka fyrir þessa ábendingu og við pössum okkur að vanda okkur betur næst. Þetta er bara rétt hjá þeim,“ segir Ævar sem segir þættina í nýju þáttaröðinni vera með öðrum hætti. Í þeim séu slökkvitæki sýnileg á borðinu og börnin eru vöruð við því að fikta með eld.