Vara notendur við þráðlausu neti

Póst- og fjarskiptastofnun varar fólk við að nota þráðlausan búnað tímabundið. Það er vegna alvarlegs veikleika sem fannst í WiFi öryggisstaðlinum WPA2. Sá staðall á að tryggja dulkóðun í þráðlausum netkerfum og er algengasti auðkenningar- og dulkóðunar staðall í dag.

Í skýrslu sem gefin var út í dag var bent á veikleikann sem gerir þráðlausar nettengingar berskjaldaðar gagnvart árásum. Bíræfnir aðilar sem eru innan dreifisvæðis tengingarinnar gætu nýtt sér þann veikleika og lesið upplýsingar sem fara þar um. Jafnvel gætu þeir breytt gögnum og komið fyrir vírusum í tölvum og tækjum.

Þetta kemur fram í tilkynningu frá stofnuninni og segir einnig að veikleikinn sé nefndur „Krack“.



„Þar sem veikleikarnir liggja í samskiptareglunum þá hefur þetta áhrif á alla framleiðendur WiFi búnaðar, stýrikerfa og fleiri. Það sem allir þessir aðilar þurfa að gera er að uppfæra búnaðinn sem fyrst.“

Netöryggissveit Póst- og fjarskiptastofnunar, CERT-ÍS, mælir með því að notendur snjallsíma, spjaldtölva og fartölva eða annarra tækja sem notast við þráðlausa tengingu notist frekar við farnet fjarskiptafélaga í staðinn. 3G eða 4G. Einnig sé öruggara að nota netkapal.

Sé nauðsynlegt að tengjast netinu í gegnum þráðlausa tengingu sé best að nota VPN tengingu.

„Búast má við því að framleiðendur þráðlauss búnaðar muni uppfæra búnað sinn á næstunni til að bregðast við þessum öryggisbresti en þangað til geta notendur varið sig gegn netárásum með því að slökkva á þráðlausum nettengingum í símum og tölvum (WiFi) og nota eingöngu 3G eða 4G í símum og snjalltækjum og netkapla fyrir tölvur,“ segir á vef Póst- og fjarskiptastofnunar.