Foreldrar beðið um skjól fyrir börnin

Dæmi eru um að foreldrar í Reykjavík hafi beðið barnaverndanefnd um að útvega börnum sínum skjól vegna húsnæðisvanda. Barnaverndarnefnd fær tilkynningu þegar foreldrar eru bornir út úr húsnæði sínu.

Í fréttum Stöðvar 2 í síðustu viku sögðum við frá fjögurra barna einstæðri móður sem var húsnæðislaus í Reykjanesbæ. Hún óskaði eftir aðstoð bæjarins en eina úrræðið sem henni bauðst var að setja börnin í fóstur. Sviðsstjóri velferðarsviðs Reykjanesbæjar segir þetta koma upp þegar útburður er hjá sýslumanni.  „Ef það er til dæmis útburður hjá sýslumanni þá eru barnaverndaryfirvöld beðin um að mæta á staðinn ef sú staða kemur upp að það þurfi að aðstoða fólk með að vista börn sín," segir Hera Ósk Einarsdóttir, sviðsstjóri velferðarsviðs Reykjanesbæjar.0



Framkvæmdastjóri Barnaverndanefndar Reykjavíkur segir sama verklag vera hjá borginni. Reynt er að hafa samband við foreldra þegar til útburðar kemur. Ef það tekst ekki eða engin lausn finnst mætir fulltrúi þeirra við útburðinn. Nokkur slík mál koma upp á hverju ári.

„Þetta eru erfiðar aðstæður. Það koma opinberir aðilar og pakka og bera búslóðina út á tún og ég held að flestir foreldrar vilji forða börnum sínum frá þessum aðstæðum," segir Halldóra Gunnarsdóttir, framkvæmdastjóri Barnaverndanefndar Reykjavíkur.

Þegar útburðurinn er vegna óreglu foreldra getur orðið úr því barnaverndarmál en þegar aðstæðurnar koma til vegna húsnæðisskorts er reynt að finna lausn með foreldrum án þess að fjölskyldunni verði sundrað. Það tekst þó ekki alltaf.

„Það eru einhver tilvik þar sem börn hafa getað verið hjá stuðningsfjölskyldum sínum einhvern tíma rétt á meðan verið er að finna einhverja lausn til skemmri tíma. Það eru dæmi um að foreldrar hafa beðið okkur um að hafa börnin í skjóli í einhverja daga á meðan þau finna út úr aðstæðunum," segir Halldóra.

Börnum hefur verið komið fyrir á vistheimili barna og í öðrum tilvikum hefur borgin útvegað fjölskyldum þak yfir höfuðið á gistiheimilum. Það reynist þó stundum erfitt.

„Það getur orðið mjög erfitt. Sérstaklega eftir að ferðamannastraumurinn til landsins varð með þessum hætti en oftast hefur það tekist," segir Halldóra.

Hún segist gjarnan vilja sjá neyðaríbúðir sem fjölskyldur í þessum aðstæðum gætu leitað í. „Það væri örugglega draumastaða að það væru til neyðaríbúðir í hverju sveitarfélagi fyrir sig. Ég held að það væri það svar sem flestir myndu gefa," segir Halldóra.