Varaformaður Neytendasamtakanna segir af sér

Ása Steinunn Atladóttir hefur sagt af sér sem varaformaður Neytendasamtakanna og sem stjórnarmaður, að því er RÚV greinir frá. Hún sendi stjórn samtakanna bréf þess efnis í kvöld.

Stjórn Neytendasamtakanna lagði fram vantrauststillögu á hendur Ólafs Arnarsonar, formanns samtakanna, þann 6. maí síðastliðinn.

Í kvöld sendi stjórnin svo frá sér tilkynningu þar sem ítrekað var að vantraust ríki á milli stjórnarinnar og formannsins. Þar var Ólafur meðal annars sakaður um trúnaðarbrest.

Sjá einnig: Ítreka að vantraust ríki á milli stjórnar og formanns

Segir Ása að hún hafi fljótt orðið þess áskynja eftir að hafa tekið að sér stöðuna að samstarfsvilji væri ekki fyrir hendi hjá formanninum.

Segir í bréfi Ásu að engin lausn sé í sjónmáli og því sjái hún sér ekki annað fært en að segja upp störfum.

„Þetta ástand hefur haft áhrif á allt starf Neytendasamtakanna og tekið kraftinn sem betur færi í að vinna að neytendamálum.“