Þórsarar Scania Cup-meistarar eftir alíslenskan úrslitaleik

Tíundi flokkur Þórs Ak. vann Stjörnuna, 93-69, í alíslenskum úrslitaleik á Scania Cup, boðsmóti bestu liða Norðurlandanna í körfubolta.

Þetta er annað árið í röð sem þessi árgangur Þórs, strákar fæddir árið 2001, fer í úrslit á Scania Cup. Í fyrra komu þeir heim með silfrið en í ár fengu þeir gullpeninga um hálsinn.

Þórsarar voru 10 stigum yfir í hálfleik, 45-35, og lönduðu að lokum öruggum sigri, 93-69.

Baldur Örn Jóhannesson var valinn besti leikmaður úrslitaleiksins. Samherji hans, Júlíus Orri Ágústsson, var valinn Scania Cup King.

Júlíus Orri og Stjörnumaðurinn Dúi Þór Jónsson voru valdir í úrvalslið mótsins.