Gefur ekki afslátt af stefnu þrátt fyrir veikan þingstyrk

Formaður Samfylkingarinnar segir að flokkurinn muni halda sínum stefnumálum til streitu og ekki gefa þau eftir í mögulegum stjórnarmyndunarviðræðum við VG og Sjálfstæðisflokkinn þótt flokkurinn sé með lítinn þingstyrk.

Stjórnarmyndunarviðræður Vinstri grænna og Sjálfstæðisflokks gætu strandað á áhugaleysi annarra flokka til að vera þriðja hjólið í slíkri ríkisstjórn. Vinstri græn vilja fá Samfylkinguna inn í ríkisstjórn þessara þriggja flokka en hún hefði 34 þingmenn.

Logi Már Einarsson formaður Samfylkingarinnar hefur átt óformleg samtöl við Katrínu Jakobsdóttur formann Vinstri grænna.

„Í mikilvægum málum höfum við verið talsvert frá Sjálfstæðisflokknum. Við höfum lagt áherslu á að þetta geta orðið flókið af þeim sökum. Ég las að Bjarni Benediktsson hefði sagt að gera þyrfti vopnahlé um ákveðin mál. Ég sagði bara, ef það vopnahlé snerist um að við gæfum afslátt af okkar málum þá kæmi það auðvitað ekki til greina,“ segir Logi Már Einarsson formaður Samfylkingarinnar.

Hvaða mál eru þetta sem þið leggið áherslu á?

„Við höfum lagt gríðarlega áherslu á uppbyggingu heilbrigðis, mennta- og velferðarkerfisins fyrir alla. Við vitum að við þurfum að afla tekna til þess. Við höfum líka áherslu á breytingar í sjávarútvegi, að þjóðin fái að kjósa í lok kjörtímabilsins um Evrópusambandið eða áframhaldandi viðræður. Við höfum lagt áherslu á að stjórnarskráin sé sett í mjög ákveðin farveg. Þetta eru allt mál sem við getum ekki gefið of mikinn afslátt af,“ segir Logi Már. 

Logi segir að hjarta VG og Samfylkingarinnar „slái þétt saman“ og það sé ef til vill ástæða þess að VG leggi áherslu á að fá Samfylkinguna að borðinu.

Ljóst er að mörg þessara mála ganga í berhögg við stefnu Sjálfstæðisflokksins. Má þar nefna stjórnarskrármálið ef um er að ræða tillögur stjórnlagaráðs og viðræður við Evrópusambandið. Sjálfstæðisflokkurinn hefur ekki áhuga á ríkisstjórnarsamstarfi með Pírötum. Þá hafa Vinstri græn ekki áhuga á samstarfi með núverandi ríkisstjórnarflokkkum, Sjálfstæðisflokki og Framsókn. Bandalag Bjartrar framtíðar og Viðreisnar flækir síðan stöðuna enn meira. Ekki virðist vera valkostur að taka annan hvorn flokkinn inn í ríkisstjórn VG og Sjálfstæðisflokksins. Að þessu sögðu er Samfylkingin hugsanlega límið sem þarf.

Nefnt hefur verið að það ríki traust milli VG og Samfylkingarinnar og þess vegna sé það ekki endilega pólitísk leikjafræði af hjálfu VG að fá Samfylkinguna að borðinu. Heldur fremur sú staðreynd að þingmenn þessara flokka treysta hver öðrum. Viðræður VG og Sjálfstæðisflokksins stóðu yfir með hléum í allan gærdag.

Málamiðlanir mögulega ekki nógu sterkt lím

Bjarni Benediktsson formaður Sjálfstæðisflokksins sagði í gær í viðtali við fréttastofuna að flokkarnir væru að athuga hvort hægt væri að gera málamiðlanir sem rúmuðust innan stefnu flokkanna.

„Eitt af því sem við þurfum að ræða um er hvort það þurfi að gera svo miklar málamiðlanir að báðum aðilum myndi á endanum líða illa með það. Jafnvel þótt það væri hægt að setja þær saman og smíða þær þá væri það hugsanlega ekki nægilega sterkt lím til að mynda ríkisstjórn en þetta eru bara þau mál sem við erum að ræða,“ sagði Bjarni.

For­seti Íslands hef­ur fall­ist á til­lögu for­sæt­is­ráðherra um að þing verði kallað sam­an þriðju­dag­inn 6. des­em­ber næst­kom­andi. Til stendur að afgreiða fjárlagafrumvarp fyrir jól.