Sveitarfélögin fá ekki greitt af staðgreiðslu frá ríkissjóði

Í dag eru þrjátíu dagar frá því verkfall fjórtan stéttarfélaga innan Bandalags háskólamanna hófst og eru samningaviðræður þar í algeru frosti. Innheimta ríkissjóðs er í lamasessi og mikil reiði ríkir meðal ljósmæðra vegna þess að launagreiðslur til þeirra voru skertar um 60 prósent um mánaðamótin.

Fyrstu verkföll BHM hófust hinn 7. apríl og nú þrjátíu dögum síðar eru um 2.300 félagsmenn enn í verkfalli, sem hefur víðtæk áhrif í heilbrigðiskerfinu, matvælaframleiðslu, hjá sýslumönnum og víðar svo eitthvað sé nefnt. Fundað var í deilunni á mánudag en nýr fundur hefur ekki verið boðaður.

„Það er ekkert að koma frá ríkinu. Á meðan ekkert kemur frá þeim þá auðvitað gerist ekki neitt,“ segir Páll Halldórsson formaður saminganefndar BHM.

Ríkið hafi heldur ekki gefið neitt fyrir þær hugmyndir sem BHM hafi lagt fram til lausnar deilunni. Það sé til lítils að funda á meðan staðan sé þessi. BHM á digra verkfallssjóði og fær fólk greitt laun úr þeim sjóði á meðan á verkfalli stendur.

„Það er ekki vandamálið. Vandamálið er hins vegar að þurfa að standa í þessu. Því þetta er mjög erfitt fyrir marga, bæði auðvitað okkar félagsmenn en ekki síður og kannski enn frekar ýmsa sem verða fyrir barðinu á þessu verkfalli að ósekju,“ segir Páll.

Og það er meðal annars mikið veikt fólk sem ekki nýtur þjónustu geislafræðinga og verðandi mæður sem ekki njóta þjónustu hátt í tvö hundruð ljósmæðra, sem funduðu í dag í verkfallsmiðstöð BHM. En reiði ríkir meðal þeirra vegna þess að 60 prósentum af launum þeirra allra var haldið eftir og því ekki greitt fyrir þá daga sem unnið var.

„Og meira að segja ljósmæður sem eru ekki í verkfalli, í heilsugæslu eða sem starfa úti á landi, það var meira að segja tekin af þeim hálfur dagur þótt þær hafi kannski verið í vinnu,“ segir Elísabet Vigfúsdóttir ljósmóðir á Landspítalanum. Hún sagði ljósmæður eðli málsins samkvæmt horfa til ljóssins og væru bjartsýnar.

Öll innheimta ríkissjóðs er í lamasessi en tuttugu og átta af þrjátíu og fjórum starfsmönnum Fjársýslu ríkisins eru í verkfalli. Nú fá sveitarfélögin að finna fyrir því. Þeirra hlutur af staðgreiðslunni verður ekki greiddur til þeirra.

„Þetta eru mjög háar fjárhæðir. Þetta hætti núna um mánaðamótin. Þetta eru tuttugu til þrjátíu milljarðar sem greiða á út um miðjan mánuðin. Þannig að sveitarfélögin fá ekki sinn hlut af staðgreiðslunni,“ segir Þorvaldur Steinarsson deildarstjóri hjá Fjársýslunni. Hann segir að jafnvel þótt verkfallið hætti í dag tæki það langan tíma að vinna upp alla útreikninga og greiðslur hjá ríkinu.

Þá fá fyrirtæki og almenningur enga greiðsluseðla frá ríkinu og reikningar frá ríkinu birtast ekki í heimabönkum sem til að mynda hefur áhrif á alla tollafgreiðslu.