Stojanovic um ofurlaunin: Handbolti er okkar vinna

Fjölþjóðlegt lið Katars hefur vakið mikla athygli fyrir frammistöðu sína á HM í handbolta. Liðið er komið alla leið í undanúrslit eftir frækinn sigur á Þjóðverjum í 8-liða úrslitum.

Hetja þess leiks var bosníski markvörðurinn Danijel Saric sem fékk keppnisrétt með landsliði Katar í október síðastliðnum. Svartfellingurinn Zarko Markovic átti einnig stórleik í leiknum en hann fékk einnig ríkisborgararétt í Katar í október.

Eins og sjá má hér fyrir neðan eru tíu af sextán leikmönnum landsliðs Katar ekki fæddir í landinu. Enginn þeirra á yfir 100 landsleiki að baki og aðeins einn, Bosníumaðurinn Eldar Memeisevic, var með Katar á HM í Svíþjóð fyrir tveimur árum síðan.

Þjálfari liðsins er Spánverjinn Valero Rivero sem gerði Spán að heimsmeisturum fyrir tveimur árum síðan. Hann neitaði, líka fyrir hönd leikmanna, að svara spurningum á blaðamannafundi á dögunum um uppruna leikmanna Katars og þjóðerni.

Sjá einnig: Rivero var túlkur Saric | Neitaði að ræða um þjóðerni

Astæðan fyrir öllu saman er fyrst og fremst peningar. Leikmenn Katars fá samkvæmt fjölmiðlum í Þýskalandi 100 þúsund evrur í bónus fyrir hvern sigur á HM - 15 milljórnir króna.

Katar hefur unnið sex leiki til þessa á mótinu og hver og einn leikmaður hefur því þegar fengið 90 milljónir króna í vasann fyrir árangurinn. Þess fyrir utan þéna þeir 30 þúsund evrur á mánuði, 4,5 milljónir króna, fyrir að leika með landsliðinu.

„Handbolti er okkar starf. Við verðum að reyna að fá eins miklar tekjur og við getum fyrir vinnuna okkar,“ sagði markvörðurinn Goran Stojanovic við þýska fjölmiðla um ofurlaun landsliðsmanna Katars.

Öllum handboltamönnum er heimilt að skipta um landslið eftir þriggja ára biðtíma en fyrir rúmu ári síðan lagði Handknattleikssamband Evrópu, EHF, fram tillögu þess efnis að leikmönnum eldri en 21 árs væri óheimilt að skipta um landslið. Sú tillaga var felld.

Joan Canellas var hetja Spánverja í leik liðsins gegn Dönum í 8-liða úrslitum keppninnar. Hann sér ekkert athugavert við að Katar hafi byggt upp sitt landslið með aðkomumönnum.

„Þetta er gott landslið. Það er fullt af góðum leikmönnum í því, þó þeir séu ef til vill ekkert mjög þekktir. Fyrst þeim stendur þetta til boða - af hverju ekki?“

Katar mætir í dag Póllandi í undanúrslitum HM í handbolta hér í Doha. Sem kunnugt er sagði Patrekur Jóhannesson, landsliðsþjálfari Austurríkis, eftir sigur Katars á Austurríki í 16-liða úrslitum að Katar myndi fara langt.

„Katar getur orðið heimsmeistari. Það gengur þeim allt í hag á þessu móti. Katar er sigurstranglegast.“

Leikmenn Katar:

Zarko Markovic (frá Svartfjallalandi)

Hassan Mabrouk (frá Egyptalandi)

Bertrand Roine (frá Frakkland)

Rafael Capote (frá Kúbu)

Abdulla Al-Karbi (frá Katar)

Danijel Saric (frá Bosníu)

Eldar Memisevic (frá Bosníu)

Goran Stojanovic (frá Svartfjallalandi)

Borja Vidal (frá Spáni)

Jovo Damjanovic (frá Svartfjallalandi)

Kamalaldin Mallash (frá Katar)

Youssef Benali (frá Túnis)

Hamad Madadi (frá Katar)

Hadi Hamdoon (frá Katar)

Mahmoud Hassab Alla (frá Katar)

Ameed Zakkar (frá Katar)