Bílar

Volkswagen fjárfestir fyrir 13.100 milljarða til að ná Toyota í sölu

Finnur Thorlacius skrifar
Úr einni verksmiðju Volkswagen.
Úr einni verksmiðju Volkswagen.
Volkswagen ætlar ekki að slaka á klónni í viðleytni sinni við að verða stærsti bílaframleiðandi í heimi. Til stendur að fjárfesta fyrir 13.100 milljarða króna, eða 106 milljarða dollara á næstu 5 árum í þróun nýrra bíla sinna.

Á þetta við öll merkin sem heyra undir Volkswagen bílafjölskylduna. Þetta þýðir 2.230 milljarða króna á ári, sem er þó ekki mikið meira en Volkswagen hefur fjárfest fyrir á hverju ári undanfarin 5 ár.

Volkswagen mun vænantanlega selja yfir 10 milljón bíla á þessu ári, í fyrsta skipti í sögu fyrirtækisins og fjórum árum fyrr en upphaflegar áætlanir sögðu til um. Volkswagen skorti aðeins 72.000 bíla í að ná Toyota eftir fyrstu 9 mánuði ársins í ár. Í fyrra munaði 227.000 bílum á Volkswagen og Toyota og því er Volkswagen að draga hratt á sölu Toyota. Á meðan féll General Motors lengra frá báðum þessum fyrirtækjum í sölu og er því enn fastar í þriðja sæti.

Frá því núverandi forstjóri Volkswagen, Martin Winterkorn, tók við hefur Volkswagen keypt Porsche, Scania, MAN og Ducati vélhjólamerkið og í leiðinni hefur Volkswagen meira en tvöfaldað verksmiðjufjölda sinn í 107 verksmiðjur um heim allan.

Volkswagen mun fjárfesta fyrir mest fé allra bílaframleiðenda í heiminum á næstu árum og það sem merkilegra er, meira en öll önnur fyrirtæki í heiminum, svo sem Samsung og Intel. Á næstu tveimur árum mun Volkswagen bílafjölskyldan mun kynna meira en 100 nýja eða endurnýjaða bíla á næstu tveimur árum. 

Mest lesið




×

Mest lesið