Plássin oftast fullnýtt

Reykjavíkurborg býður gistipláss og búsetuúrræði fyrir 60 til 64 einstaklinga sem eru í mikilli vímuefnaneyslu og eiga í engin hús að venda. Sigtryggur Jónsson, framkvæmdastjóri Þjónustumiðstöðvar Miðborgar og Hlíða, segir plássin oftast fullnýtt.

„En það er auðvitað misjafnt hvernig Gistiskýlið og Konukot eru nýtt þar sem þau eru neyðargistiskýli yfir nóttina," útskýrir hann og bætir við að íbúarnir séu almennt ánægðir með þá þjónustu sem þeim býðst. „Þó getur vissulega eitthvað komið upp á eins og gengur og gerist alls staðar."

Áfengis- og vímuefnanotkun er bönnuð inni á öllum stöðunum. „En þessir staðir eru allir þannig að það er heimilt að dvelja þar undir áhrifum," segir Sigtryggur. „Það er engin krafa um edrúmennsku þó svo að neysla áfengis og vímuefna sé bönnuð innandyra."

Fleiri úrræði eru í boði fyrir útigangsfólk í Reykjavíkurborg heldur en þau sem bjóða upp á gistingu eða húsaskjól. Má þar nefna félagslega ráðgjöf þar sem starfsmenn frá þjónustumiðstöðinni fara í vettvangsferðir á þá staði í miðborginni sem utangarðsfólk venur komur sínar og miðlar upplýsingum um þá þjónustu sem er í boði.

Undanfarið hefur einnig verið greint frá nýju átaksverkefni Reykjavíkurborgar, Borgarvörðum, sem er færanlegt vettvangsteymi sérfræðinga sem þjónusta utangarðsfólk. Teyminu er ætlað að aðstoða fólk í neyslu sem lendir í aðstæðum á almannafæri sem það ræður ekki við eða veldur öðrum ónæði. Borgarverðir munu aðstoða viðkomandi við að komast í viðeigandi skjól eða kalla eftir annarri aðstoð eftir þörfum og sinna forvarna- og leitarstarfi. Tveir fagaðilar frá velferðarsviði og einn frá lögreglunni starfa saman í hóp hverju sinni.