D'Antoni: Vonbrigði ef við keppum ekki um titilinn

Mike D'Antoni er ekki byrjaður að vinna hjá LA Lakers þó svo búið sé að ganga frá ráðningu hans. Hann heldur til LA í dag og veit að það bíður hans erfitt og krefjandi starf.

Það er alltaf pressa að vera þjálfari hjá Lakers en þar sem hann var tekinn fram yfir sjálfan Phil Jackson er pressan meiri en ella.

"Ég mun gera allt sem ég get til þess að gera Lakers að meistaraliði. Ef við erum í það minnsta ekki að keppa um titil þá hef ég brugðist. Ég sætti mig við það," sagði D'Antoni.

Stuðningsmenn Lakers vildu fá Phil Jackson í starfið og sungu nafn hans eftir að Mike Brown var rekinn. Þeim varð ekki að ósk sinni og það er undir D'Antoni komið að sanna að stjórn Lakers hafi valið rétt.