Pato verður í liði Milan gegn Barcelona

Brasilíumaðurinn Pato snéri aftur í lið AC Milan um helgina eftir tvo mánuði utan vallar vegna meiðsla. Pato snéri aftur með látum og verður væntanlega í liði Milan gegn Barcelona í Meistaradeildinni á kostnað landa síns, Robinho.

Frammistaða Pato var mun betri en hjá Robinho og hann mun því fá tækifærið gegn Barca að því er La Gazzetta dello Sport segir.

Það gekk vel síðast hjá Pato gegn Barcelona en þá skoraði hann eftir aðeins 24 sekúndur.

Brasilíumaðurinn hefur tekið þátt í sex leikjum Milan í vetur og markið gegn Barcelona er eina markið sem hann hefur skorað.