Wiltord bjargaði Lyon

Franski sóknarmaðurinn Sylvain Wiltord átti magnaða endurkomu eftir næstum þriggja mánaða fjarveru vegna meiðsla og tryggði Lyon 3-3 jafntefli gegn Sochoux í frönsku úrvalsdeildinni í gær nánast upp á eigin spýtur. Wiltord kom inn á þegar skammt var eftir, en náði að skora mark og fiska vítaspyrnu í viðbótartíma.

Það benti ekki margt til þess að Lyon fengi eitthvað út úr leiknum gegn Sochoux í gærkvöldi því þegar venjulegur leiktími rann út var liðið tveimur mörkum undir, 1-3, á heimavelli. Þá tók Wiltord, nýkominn inn á sem varamaður, til sinna ráða. Hann minnkaði muninn á 91. mínútu og fiskaði síðan vítaspyrnu þegar þrjár mínútur voru komnar yfir venjulegan leiktíma sem Juninho skoraði örugglega úr.

Lyon er áfram langefst í frönsku deildinni með 58 stig úr 26 leikjum en Sochaux er í fjórða sæti með 40 stig.