Sýknaður af ákæru um frelsissviptingu

Hæstiréttur sýknaði í dag karlmann af ákæru um frelsissviptingu og sneri þannig við dómi héraðsdóms sem dæmt hafði manninn í eins mánaðar skilorðsbundið fangelsi. Maðurinn var ákærður fyrir að hafa haldið starfsmanni Orkuveitu Reykjavíkur nauðugum í um hálfa klukkustund á skrifstofu fyrirtækis hans í Kópavogi.

Maðurinn hafði komið að starfsmanni OR, sem var kona, í sameignarhluta hússins þar sem konan hafði lokað fyrir rafmagn til þess hluta hússins sem maðurinn starfaði í vegna ætlaðra vangoldinna reikninga þrátt fyrir að fyrir lægi að maðurinn hefði greitt fyrir rafmagnsnotkun í húshlutanum fram yfir umræddan tíma.

Féllst konan á að koma með manninum inn á skrifstofu hans í húsinu en hann vildi að hún yrði á staðnum þar til skýringar hefðu fengist hjá Orkuveitunni á lokunaraðgerðinni, og síðar, eftir að hringt var á lögreglu, þar til hún væri komin á staðinn.

Í dómnum var litið til þess að konan hefði sjálfviljug farið með mannum inn á skrifstofu hans. Þá var talið ósannað að konan hefði leitað útgöngu úr húsnæðinu meðan á þessu stóð og þar með að ákærði hefði hindrað slíkar fyrirætlanir með valdi. Enn fremur var litið til þess hversu stuttan tíma atburðirnir stóðu yfir og í ljósi alls þessa var ekki fallist á að maðurinn hefði svipt konuna frelsi sínu. Var hann því sýknaður og skaðabótakröfu vísað frá dómi.