Miklar annir á lokaspretti þingsins fyrir jól

Miklar annir verða á Alþingi Íslendinga í dag enda hafa stjórnarliðar og stjórnarandstæðingar orðið ásáttir um að hefja jólafrí þingsins á morgun. 35 mál eru á dagskrá þingfundar í dag sem hófst klukkan tíu.

Önnur umræða um frumvarp um Ríkisútvarpið ohf. heldur áfram í dag en ákveðið var í gær að fresta þriðju umræðu um það fram yfir áramót. Önnur umræða verður einnig um fjölmörg önnur frumvörp sem ætlunin er að samþykkja fyrir áramót. Þá mælir Geir H. Haarde forsætisráðherra fyrir frumvarpi um fjármál stjórnmálaflokkanna sem hann flytur ásamt formönnum hinna stjórnmálaflokkanna.

Líklegt má telja að fundur standi langt fram á kvöld en annar fundur hefur verið boðaður klukkan hálftíu í fyrramálið. Eftir að honum lýkur komast þingmenn í langþráð jólafrí.