Látum United ekki taka okkur í bólinu aftur

Frank Lampard, leikmaður Chelsea, segir að Englandsmeistararnir verði að mæta eins og öskrandi ljón inn á völlinn þegar þeir mæta Manchester United á sunnudaginn. Hann segir leikmenn Chelsea hafa fylgst vel með gangi mála hjá United í vetur, en þrjú stig skilja toppliðin að og verður því hart barist um helgina.

"Við verðum að vera einbeittir og byrja vel, því ég hef séð hvernig United byrjar leiki í vetur og þeir byrja alla leiki sína af fullum krafti. Ef við náum að koma vel einbeittir til leiks og náum tökum á spilinu, veit ég að við getum náð að halda okkar hlut og vel það," sagði Lampard og er enn ekki búinn að gleyma tapinu fyrir United á síðustu leiktíð þegar enginn annar en Darren Fletcher skoraði sigurmarkið.

"Það var mjög svekkjandi að tapa þeim leik því við höfðum verið á mjög góðum spretti fram að því. Við áttum ekki skilið að tapa þeim leik, en ég man að United liðið mætti einmitt mjög sprækt til leiks þá og gerði okkur erfitt fyrir með hraðanum - en eftir að við náðum að hægja á leiknum, féll hann okkar meginn og því fannst mér við eiga skilið í það minnsta eitt stig," sagði Lampard og bætti við; "Við munum ekki láta taka okkur í bólinu í þetta skiptið."