Benitez vill hirða toppsætið

Rafa Benitez, stjóri Liverpool, hefur lagt ríka áherslu á það við leikmenn sína að reyna að ná toppsætinu í C-riðli Meistaradeildarinnar í undirbúningi liðsins fyrir leikinn við PSV á Anfield í kvöld.

Liðin eru jöfn að stigum í efsta sæti riðilsins fyrir leik kvöldsins en Benitez vonar að toppsætið í riðlinum færi Liverpool hugsanlega lakari andstæðing í 16-liða úrslitunum.

"Ég vil auðvitað ná toppsætinu en maður veit aldrei hvað tekur við í 16-liða úrslitunum, því þá gæti eitthvað af liðunum þess vegna verið búið að kaupa leikmenn og verið búið að styrkja sig. Gengi liðanna getur breyst mikið á þessum vikum, en ég held samt að það sé gott fyrir sjálfstraust leikmanna að fara inn í næstu umferð með sigur í riðlinum á bakinu."