Eiður Smári skoraði tvö í sigri Barcelona

Eiður Smári Guðjohnsen átti mjög góðan leik og skoraði tvö fyrstu mörk Barcelona þegar Spánar- og Evrópumeistararnir unnu Mallorca, 4-1, á útivelli í spænsku úrvalsdeildinni í kvöld.

Mörk Eiðs Smára komu á 42. og 58. mínútu en landsliðsfyrirliðinn fór síðan út af á 73. mínútu. Victor Casadeus minnkaði muninn á 70. mínútu en Andres Iniesta og Santiago Ezquerro bættu við mörkum fyrir Barca á lokamínútunum.

Með sigrinum komst Barcelona í toppsæti spænsku deildarinnar að nýju en Sevilla náði að setja þar í tæpan sólarhring eftir að hafa sigrað Valencia í gærkvöldi. Real Madrid er í þriðja sæti með 23 stig, þremur stigum minna en Barcelona.

Eiður Smári hefur skorað sjö mörk fyrir Barcelona frá því hann gekk í raðir liðsins frá Chelsea í sumar.