Ferguson hrósar sínum mönnum

Alex Ferguson, knattspyrnustjóri Man. Utd. hrósaði leikmönnum sínum í hástert eftir leikinn gegn Sheffield United í dag og sagði þá hafa sýnt mikinn karakter með því að tryggja sér sigur eftir að hafa lent undir.

"Við vorum miklu meira með boltann og héldum honum einstaklega vel innan liðsins. Mér hefði ekki þótt sanngjarnt að fara héðan án þriggja stiga," sagði Ferguson.

"Þetta var alls ekki auðvelt og Sheffield United gerði okkur afar erfitt fyrir. Ég hef séð nokkra leiki með þeim upp á síðkastið og ég held að þeir geti vel haldið sér í þessari deild," sagði Ferguson.

Skotinn hrósaði Wayne Rooney, markaskorara Man. Utd. í leiknum, sérstaklega. "Hann var stórkostlegur og það er ekki lengur viðeigandi að tala um hversu lengi hann var að finna formið. Hann er einn sá allra besti," sagði Ferguson.