Marca segir Cannavaro fá Gullknöttinn

Spænska útvarpsstöðin Marca í Madrid heldur því fram eftir heimildarmönnum sínum í kvöld að ítalski varnarmaðurinn Fabio Cannavaro hjá Real Madrid muni verða sæmdur Gullknettinum í lok mánaðarins.

Það er franska knattspyrnublaðið France Football sem stendur fyrir valinu ár hvert og sagði Marca að menn frá franska blaðinu væru nú staddir í Madrid þar sem þeir væru að undirbúa viðtal við Cannavaro.

Cannavaro þótti leika einstaklega vel með heimsmeisturum Ítala á HM í sumar og fékk viðurnefnið "Berlínarmúrinn" fyrir vikið. Gullknötturinn verður afhentur formlega þann 27. nóvember næstkomandi.