Ungu leikmennirnir verða að leggja harðar að sér

Thierry Henry, fyrirliði Arsenal, segir að ungu mennirnir í liðinu verði að leggja harðar að sér og geti ekki búist við því að hann sjálfur dragi vagninn.

"Strákarnir geta ekki ætlast til þess að ég geri alla erfiðu hlutina á vellinum og verða að læra að leggja hart að sér. Það er gjörólíkur hlutur fyrir mig að spila með landsliðinu eða með Arsenal, því strákarnir í franska landsliðinu vita hvað þeir eiga að gera. Ungu leikmennirnir sem koma til Arsenal fá oft bara stjörnur í augun og segja "vá" þegar búið er að skaffa þeim íbúð í London. Það kemur því í minn hlut að segja þessum mönnum að þó þeir hafi vissulega hæfileika - verði þeir að leggja mjög hart að sér ef þeir ætli sér að ná árangri hérna," sagði Frakkinn.