Sol Campbell í vandræðum

Varnarmaðurinn Sol Campbell hjá Arsenal á ekki sjö dagana sæla um þessar mundir og í gærkvöld yfirgaf hann völlinn þegar honum var skipt útaf í hálfleik fyrir að eiga sök á tveimur mörkum West Ham í hálfleiknum. Arsenal tapaði leiknum á heimavelli sínum og menn rekja það mikið til þess að Campbell sé hreinlega ekki í formi.

"Miðverðir verða að vera viðbragðsfljótir og geta stokkið hátt og Campbell hefur þessa hluti einfaldlega ekki í dag. Þegar maður horfir á hann spila, finnst manni hann bara alls ekki vera í formi og ég held að hann hafi ekkert að gera í enska landsliðshópinn ef hann heldur áfram að spila svona," sagði Alan Hansen á BBC.