Gæti snúið aftur til Ítalíu í sumar

Framherjinn sterki, Hernan Crespo, hefur látið í veðri vaka að hann vilji snúa aftur til Ítalíu eftir að tímabilinu lýkur á Englandi í vor og segist sakna ítalska lífsstílsins.

"Við erum þegar búnir að vinna góðgerðaskjöldinn, erum með 13 stiga forskot í deildinni og erum með besta knattspyrnustjóra í heiminum. Engu að síður eru fleiri hlutir mikilvægir í lífinu en fótboltinn og mig langar gjarnan að fara aftur til Ítalíu eftir að leiktíðinni lýkur í vor," sagði Crespo og segist meðal annars sakna vina sinna, leikhússins og bíóhúsanna á Ítalíu.