Yfirburðir Chelsea endast ekki lengi

Gary Neville segir að þó vissulega líti út fyrir að Chelsea muni rúlla upp ensku úrvalsdeildinni í ár eins og í fyrra, muni yfirburðir liðsins ekki vara lengi og bendir á önnur lið sem hafi náð að verða meistarar en hrunið í kjölfarið.

"Það þarf enginn að segja mér að þjálfarar og leikmenn liðsins muni ekki vilja fara til einhverra af stórliðunum á meginlandinu á næstu árum. Lið Chelsea er sannarlega ósigrandi þessa dagana og ekkert lát virðist á sigurgöngu þeirra, en ég er ósammála þeim sem vilja meina að velgengni þeirra taki ekki enda. Af hverju haldið þið að lið Porto hafi leyst upp eftir að vinna Meistaradeildina 2004? Af hverju haldið þið að Blackburn hafi hrunið eftir að verða meistarar árið 1995?

Chelsea hefur peninga til að borga há laun og kaupa góða leikmenn, en fyrr eða síðar verður alltaf freistandi fyrir leikmenn að fá að kynnast því að spila á Nou Camp, Bernabeu, Old Trafford eða San Siro og ég held að stjórinn minn Alex Ferguson hafi orðað þetta best þegar hann sagði að þó Chelsea væri vissulega ótrúlega stöðugt lið, næði það ekki að hækka standardinn í ensku knattspyrnunni. Chelsea er ekki eins og Barcelona hvað það varðar, en Barcelona er auðvitað lið í algjörum sérflokki hvað varðar fallega knattspyrnu. Á hinn bóginn er ekki hægt að deila á varnarvinnu og skipulag Chelsea - 19 sigrar í 21 leik tala sínu máli," sagði Neville í samtali við The Sun.