Bolton að kaupa markvörð

Úrvalsdeildarlið Bolton mun væntanlega ganga frá kaupum á nýjum markverði á allra næstu dögum, en sá er frá Oman og heitir Ali Al Habsi og hefur leikið með Lyn í Noregi síðustu ár. Sam Allardyce hefur lengi haft augastað á markverðinum unga, en hefur fram að þessu ekki geta útvegað honum atvinnuleyfi vegna þeirra fáu landsleikja sem hann hafði spilað.

Al Habsi þessi er talinn einn af betri markvörðum í Asíu og mun fara til Englands á næstu dögum til að ganga frá samningi sínum við félagið, en hann fær þó tæplega atvinnuleyfi fyrr en í sumar.