Meiðslin ekki eins alvarleg og óttast var

Meiðsli James Morrison, leikmanns Middlesbrough, eru ekki eins alvarleg og óttast var í fyrstu, en hann rotaðist í leik Boro og Tottenham fyrr í dag eftir samstuð við Robbie Keane. Morrison lá hreyfingarlaus á vellinum eftir að hafa fengið spark í höfuðið, en þegar til búningsherbergja kom, rankaði hann við sér og er nú á batavegi.

"Fyrst héldum við að þetta væri mjög alvarlegt, en þegar í búningsherbergið var komið kom í ljós að hann var að ranka eitthvað við sér. Hann fékk heilahristing og verður skoðaður vel, en þarf varla að fara á sjúkrahús," sagði Steve McClaren, stjóri Boro.