Myndbandsdómgæsla tekin upp í Olísdeildunum

Dómaranefnd HSÍ hefur sent þjálfurum liðanna í báðum deildum reglurnar ásamt samantekt á helstu atriðum og beðið þá að fara yfir þær með leikmönnum og öðrum liðsfulltrúum.

„Myndbandsdómgæslan breytir ekki leikreglum IHF. Hún er hjálpartæki fyrir dómara sem taka áfram ákvarðanir á grundvelli eigin mats. Aðeins má grípa til hennar í þeim 11 tilvikum sem talin eru upp í 2. grein reglnanna. Þar á meðal er að skera úr um hvort mark hafi verið skorað, alvarleg atvik utan sjónlínu dómara, átök á leikvelli og atvik á síðustu 30 sekúndum leiks,“ segir í yfirlýsingu HSÍ.

Ákvörðun dómara er aðeins breytt ef upptakan gefur skýrar og ótvíræðar sannanir. Þá má ekki beita myndbandsdómgæslu eftir að boltinn hefur skipt tvisvar um lið frá atvikinu.