Sjáðu mörkin í Dalnum og í höllinni sem „KSÍ ætti ekki að leyfa“

Íslandsmeistarar Breiðabliks komust upp fyrir FH með 1-1 jafntefli við Þrótt í Laugardalnum. Katelyn Duong kom Blikum yfir í lok fyrri hálfleiks en Sierra Lelii jafnaði metin með skalla eftir hornspyrnu í seinni hálfleik.

Eftir skiptingu deildarinnar leika sex efstu liðin gegn hvert öðru, sem sagt fimm umferðir, og þar sem Breiðablik er yfir FH á markatölu núna þá mætast liðin á Kópavogsvelli í lokaumferðinni.

Spennan er ekki síðri í neðri hluta deildarinnar, þar sem fjögur lið spila. Þar er allt í hnút eftir 2-1 sigur Víkings gegn Stjörnunni í Miðgarði í gær, í höll sem Einar Guðnason þjálfari Víkings benti á að væri engan veginn boðleg fyrir leiki í Bestu deildinni. „KSÍ á ekki að leyfa þetta. Þetta er bara van­virðing við deildina,“ sagði Einar.

Einar og hans konur gátu þó fagnað sætum sigri þar sem hin danska Thea Rhode skoraði sitt fyrsta mark og tryggði 2-1 sigur á 89. mínútu. Áður hafði Bergþóra Sól Ásmundsdóttir komið Víkingi í 1-0 en Snædís María Jörundsdóttir jafnað.