Furðu lostinn og reiður Nökkvi laus við bann

Aganefnd hollenska knattspyrnusambandsins komst að þeirri niðurstöðu að ekki hefði verið um alvarlegt brot að ræða hjá Nökkva, sem rekinn var af velli á 22. mínútu í leik með Telstar gegn Cambuur á sunnudaginn. Skaðinn verður því ekki meiri en hann er nú þegar orðinn.

Eins og sjá má á myndbandinu hér að neðan var Nökkvi furðu lostinn yfir að sjá rauða spjaldið enda virtist hann varla snerta mótherja sinn, Billy van Duijl, sem þó lá lengi eftir og kveinkaði sér.

Nökkvi var skiljanlega reiður og bað dómarann, Joey Kooij, um að skoða atvikið í varsjánni: „Þú sagðir að ég hefði snert hnéð á honum,“ kallaði Nökkvi til dómarans áður en hann neyddist til þess að ganga í burtu, þar sem Kooij virtist ekki hafa neinn áhuga á að skoða atvikið betur.

Markvörðurinn skoraði tvö

Leiknum lauk með 2-2 jafntefli en úrslitin vöktu athygli um allan heim því bæði mörk Telstar skoraði markvörður liðsins, Ronald Koeman yngri. Þessi 31 árs gamli markvörður er greinilega sparkviss eins og pabbi sinn og nafni því hann fékk að taka bæði víti Telstar í leiknum. Komean jafnaði metin í 2-2 á elleftu mínútu uppbótartíma við gríðarlegan fögnuð.

Nú þegar Nökkvi er laus við bann er ljóst að hann getur spilað gegn Twente annað kvöld. Telstar er með fjögur stig eftir fjóra leiki og situr í 14. sæti af 18 liðum.