„Mun ekki kvarta næst þegar ég borga skatt“

Pål Anders liggur nú inni á sjúkrahúsi í Ósló þar sem að blaðamaður NRK náði af honum tali en núna um helgina, í keppni í útjaðri Ósló, féll Pål Anders af hjóli sínu í stökki og viðbeinsbrotnaði auk þess sem hann braut þrettán rifbein. Þá er hann með sjáanlega áverka á andliti eftir fallið.

Blaðamaður NRK sagði Pål Anders auðsjáanlega vera hrærðan.

„Mér finnst hjálpin sem ég hef fengið alveg frábær. Næst þegar að ég borga skatta mun ég ekki kvarta,“ sagði norski kappinn ánægður með heilbrigðisþjónustuna ytra.

Slysið átti sér stað á Super Enduro meistaramóti á braut í Kongsberg á laugardaginn.

„Ég stökk aðeins of stutt og datt fram fyrir mig. Við lendinguna á braut ég viðbein og rifbein. Ég er ótrúlega þakklátur fyrir að það sé allt og sumt. Þetta grær.“

Hann hrósar viðbragðsaðilum á vegum keppninnar en læknar á staðnum hlúðu að honum áður en Pål Anders var fluttur með sjúkraþyrlu til Ósló.

Pål Anders er 57 ára gamall og enn að. Hann er einn sigursælasti mótorhjólakappi Noregs frá upphafi og varð meðal annars Evrópumeistari í Enduro árið 2000 og heimsmeistari í eyðimerkurralli árið 2004. 

Þetta er í þriðja sinn á 39 ára ferli hans í mótorsportinu sem Pål Anders slasast alvarlega á ferlinum.