Minnst fimm látnir eftir flug­slys í Flórída

Bandarísk flugmálayfirvöld segja að Boeing 767-þotan hafi farið út af flugbrautinni um klukkan 14 að staðartíma, eða um 18 á íslenskum tíma. Sky News greinir frá þessu. Hlé hefur verið gert á annarri umferð á flugvöllinn. Um sextíu slökkviliðsmenn eru sagðir vera á vettvangi.

Um 250 flugferðum hafði verið seinkað síðdegis í dag að staðartíma.

Amazon staðfestir í yfirlýsingu að þota Amazon Air sem rekin er af 21 Air hafi „lent í atviki við tilraun til lendingar á Miami-alþjóðaflugvellinum í dag.“

Enn væri verið að safna upplýsingum um atburðarásina og unnið væri með yfirvöldum og ráðamönnum til að skilja hvað átti sér stað.

„Akkúrat núna er öryggi, velferð og umönnun allra sem hlut eiga að máli forgangsatriði okkar. Við erum að gera allt sem við getum til að styðja við þá sem þetta hafði áhrif á.“

Sean Duffy, samgönguráðherra Bandaríkjanna, sagði á X, áður Twitter, að búið væri að gefa út flugbann á alþjóðaflugvellinum á meðan viðbragðsaðilar meta aðstæður.

„Ef þú ert að ferðast um svæðið, vinsamlegast reiknaðu með verulegum seinkunum og mögulegum afbókunum.“

Fréttin er í vinnslu.