Nýi Japaninn að­stoðaði Hákon við rán

Japaninn Ayase Ueda, sem mætti Íslandi í vináttulandsleik í sumar og skoraði tvö mörk gegn Túnis á HM, þreytti frumraun sína með Lille í kvöld eftir að hafa verið fenginn frá Feyenoord. Hann skoraði strax í fyrsta leiknum, á 73. mínútu, og það reyndist sigurmarkið.

Samkvæmt tölfræði Sofascore voru vænt mörk (e. xG) Lille 1,06 í leiknum en vænt mörk heimamanna 3,41 svo það er greinilega margt til í því að um rán hafi verið að ræða.

Eftir jafnteflið við PSG í síðustu viku, þar sem Hákon skoraði frábært mark, og sigur gegn Angers í fyrstu umferð eru Lille-menn nú með sjö stig á toppi deildarinnar. Önnur lið eiga hins vegar eftir að spila í 3. umferðinni en aðeins Monaco getur gert meira en jafnað Lille að stigum. Monaco-menn unnu fyrstu tvo leiki sína og sækja PSG heim annað kvöld.

Markalaust hjá Orra og félögum

Á Spáni urðu Orri Steinn Óskarsson og félagar í Real Sociedad að sætta sig við markalaust jafntefli á heimavelli við Celta Vigo. Orri var í byrjunarliði heimamanna en var skipt af velli eftir 70 mínútna leik þegar Goncalo Guedes kom inná.

Real Sociedad fer nokkuð rólega af stað og er nú með fjögur stig eftir fjóra leiki.

Tómas fagnaði eftir grannaslag

Í skosku úrvalsdeildinni var grannaslagur á milli Hibernian og Hearts. Tómas Bent Magnússon var á varamannabekknum hjá Hearts þar til á 71. mínútu en þá var staðan þegar orðin 3-1 fyrir Hearts og það urðu lokatölurnar.

Tómas og félagar, sem voru á útivelli, voru manni fleiri frá 62. mínútu eftir að Jack Iredale fékk sitt annað gula spjald og þar með rautt, skömmu eftir að Hibernian hafði minnkað muninn í 2-1.

Hearts er með níu stig eftir fjóra leiki en Hibernian sex stig.

Viktor Bjarki snemma inná en ekki með í látunum

Í Danmörku var Viktor Bjarki Daðason ekki í byrjunarliði FCK í stórleik gegn Nordsjælland en hann fékk að koma inná strax á 35. mínútu, þegar Andreas Cornelius meiddist. Þá var staðan orðin 2-0 fyrir FCK og það urðu líka lokatölur leiksins. Rúnar Alex Rúnarsson sat á varamannabekk FCK.

Miklar ryskingar urðu eftir um klukkutíma leik og á endanum hlutu þrír leikmenn gult spjald, og einn úr starfsliði FCK rautt spjald, en Viktor Bjarki skipti sér ekkert af þessum látum.

Eftir sigurinn er FCK á toppi dönsku úrvalsdeildarinnar með 15 stig, tveimur stigum fyrir ofan Nordsjælland, Bröndby og Viborg, og einu stigi fyrir ofan Midtjylland sem er í 2. sæti.