Glódís Perla hélt hreinu þegar lið hennar jafnaði met

Glódís Perla Viggósdóttir spilaði allan leikinn þegar Bayern tók á móti Mainz. Bakvörðurinn Giulia Gwinn kom Bayern yfir á 38. mínútu en heimakonurnar voru mun betri allan leikinn.

Lið Bayern hélt boltanum örugglega og sköpuðust ekki mörg færi fyrir gestina í Mainz. Glódís Perla var góð í uppspili liðsins og var fljót að bregðast við ef Mainz ætlaði að sækja.

Á 64. mínútu fór Magdalena Eriksson af velli en hún byrjaði leikinn við hlið Glódísar Perlu í miðverðinum. Fyrir hana kom Vanessa Gilles og átti hún eftir að setja svip sinn á leikinn. Í uppbótartíma náði hún að innsigla öruggan 2-0 sigur og er Bayern eitt af aðeins fjórum liðum sem hafa unnið sína fyrstu tvo leiki í deildinni.

Þetta var gríðarlega mikilvægur leikur því þetta var 44. leikurinn í röð sem Bayern spilar í þýsku úrvalsdeildinni án þess að tapa. Liðið er því að jafna sitt eigið met og getur slegið það með sigri í næsta leik þegar liðið fær Freiburg í heimsókn.