Reknu vinirnir mætast í London

Leikur Fulham og Chelsea hefst klukkan 19 í kvöld á Sýn Sport. Þar mætast stjórarnir sem stýrðu Real Madrid á síðustu leiktíð en Alonso var rekinn þaðan í janúar og Arbeloa fékk þá að stýra liðinu tímabundið í nokkra mánuði.

Þeir eru góðir vinir eftir að hafa spilað saman í samtals sjö ár með Liverpool og Real Madrid, og einnig unnið heimsmeistaratitil og tvo Evrópumeistaratitla með spænska landsliðinu. Alls léku þeir saman 262 leiki með félags- og landsliði, meðal annars undir stjórn Benitez, Jose Mourinho, Carlo Ancelotti og Vicente del Bosque.

„Við erum mjög góðir vinir, þar til á mánudagskvöld,“ sagði Arbeloa léttur á blaðamannafundi og Alonso tók í sama streng: „Þegar við erum mættir út á völl erum við ekki vinir.“

Þeir Alonso og Arbeloa léku báðir undir stjórn Rafa Benítez hjá Liverpool á árunum 2007-2009 og í samtali við BBC fyrir leikinn í kvöld er Benítez hreinskilinn varðandi það hvort hann hefði reiknað með því að þeir yrðu knattspyrnustjórar:

„Alonso, já. Arbeloa, í raun ekki. Fyrir mér þá kom Arbeloa á óvart.“

Arbeloa tók við Fulham af Marco Silva sem hætti eftir þrjú ár með liðið til þess að taka við Benfica. Eina reynsla Arbeloa af því að vera aðalþjálfari er með Real Madrid í vor. Alonso náði hins vegar afar eftirtektarverðum árangri með Leverkusen áður en hann fékk tækifærið til að stýra Real en entist aðeins í hálfa leiktíð þar.

„Alvaro þekkir ensku úrvalsdeildina en hann hefur minni reynslu en Xabi. Við verðum að komast að því hvernig hann spjarar sig utan Real Madrid, sem verndar þig á vissan hátt. Utan félagsins þurfa menn að standa á eigin fótum,“ sagði Benitez.