Steinn Ár­mann er látinn

Þetta kemur fram í tilkynningu frá aðstandendum Steins.

Steinn lauk námi frá Leiklistarskóla Íslands árið 1989. Hann vakti fyrst athygli á tíunda áratugnum sem annar helmingur Radíusbræðra, sem segja má að hafi rutt íslensku uppistandi braut á sínum tíma.

Hann lék jafnframt á bassa með hljómsveitinni Kátum piltum frá Hafnarfirði.

Steinn starfaði sem dagskrárgerðarmaður, fyrst á Aðalstöðinni og síðan á Bylgjunni þar sem hann var einn stjórnenda hinna vinsælu útvarpsþátta Radíus, Górillan og King Kong.

Steinn lék í fjölda sjónvarpsþátta, leikrita og kvikmynda. Þar má nefna: Limbó, Radíus, Veggfóður, Áfram Latibær, Astrópíu, Stellu í framboði, Hross í oss, Vodkakúrnum og Ófærð.

Hann lék einnig köttinn Kela í Stundinni okkar um árabil sem vann hug og hjörtu yngstu kynslóðarinnar auk annarra smærri hlutverka í ýmsu barnaefni. Hann var annar höfunda jóladagatalsins Klængur sniðugi ásamt Davíð Þór Jónssyni og skrifaði og lék í Trjálfunum ásamt Helgu Brögu Jónsdóttur. Þá þekkja íslenskir foreldrar og börn rödd Steins býsna vel, en hann hefur talsett ógrynni teiknimynda og barnaefnis undanfarin ár.

Auk þessa starfaði hann um hríð í Reiðhjólaversluninni Erninum og var leiðsögumaður fyrir erlenda ferðamenn á sumrin.

Steinn lætur eftir sig eiginkonu og tvo syni. Jarðarför hans verður auglýst síðar.