Sögu­fræg Douglas DC 6 á leiðinni til Reykja­víkur

Flugvélar þessarar gerðar voru uppistaðan í millilandaflugi íslensku flugfélaganna, bæði Loftleiða og Flugfélags Íslands, á árunum fyrir 1960 og þar til þotuöldin gekk í garð. 

Þær lögðu grunninn að mestu velgengnisárum Loftleiða og gerðu Norður-Atlantshafsflug félagsins að raunhæfum valkosti í alþjóðlegri samkeppni á flugleiðum milli Evrópu og Ameríku, allt þar til Rolls Royce-vélarnar, eða monsarnir, leystu þær af hólmi. Síðar þjónuðu þær meðal annars í Biafra-hjálparflugi sem þjóðkirkjur Norðurlandanna stóð fyrir í samstarfi við Loftleiðamenn.

Fraktflugfélagið Iscargo gerði slíkar vélar út frá Reykjavíkurflugvelli á árunum 1972 til 1982. Jafnan þótti mikið ævintýri að sjá þær lenda og taka á loft.

Flugvélin sem er væntanleg er á leið til Bandaríkjanna á Oshkosh-flugsýninguna og fleiri sýningar. Hún er á vegum félagsins The Flying Bulls, sem sérhæfir sig í varðveislu gamalla og sögufrægra flugvéla. DC 6B-flugvélin var smíðuð árið 1958 fyrir júgóslavneska ríkisflugfélagið JAT. Hún var með lúxusinnréttingu og þjónaði sem þjóðhöfðingaflugvél fyrir Josip Broz Tito. Tito seldi hana síðan þjóðhöfðingja Zambiu, Kenneth Kaunda.

Tvær aðrar gamlar flugvélar lentu einnig í Reykjavík í gær, Lockheed P-38 Lightning frá árinu 1944, einnig á vegum The Flying Red Bulls, sem og önnur stríðsáravél af gerðinni Douglas A26 invader, en sú er í eigu einkaaðila. Þær héldu báðar á brott í morgun, einnig á leið á flugsýningar vestanhafs.