Gunn­laugur æfði ó­vænt með DeChambeau og Reed

Gunnlaugur tók æfingahring með DeChambeau og Reed í gær á Shinnecock Hills golfvellinum, þar sem Opna bandaríska fer fram frá fimmtudegi til sunnudags.

DeChambeau og Reed voru tvær af stærstu LIV-mótaraðarinnar og hafa báðir unnið risamót. Reed vann Masters árið 2018 og DeChambeau vann Opna bandaríska tvisvar, 2020 og 2024.

Hulda Bjarnadóttir, forseti Golfsambands Íslands, sagði frá hringnum í Bítinu á Bylgjunni í morgun.

Hún sagði jákvætt að Gunnlaugur geti hrist af sér stressið fyrir komandi risamót með stærstu nöfnum golfsins.

„Fólk var búið að tala um að hann yrði með Scottie Scheffler, af því þeir eru með sömu umboðsskrifstofu og umboðsskrifstofan hugsar auðvitað: Hvernig getum við hámarkað virði þessa unga kylfings? Auðvitað skellum við honum út á völl með Scottie og þessum og hinum.

En svo kom þetta óvænt inn í gær, hann var að spila með [Bryson] DeChambeau og Patrick Reed.

Þetta er rosalega gott, út frá því sjónarmiði að hann hristir af sér skjálftann, sviðsskrekkinn og stressið. Þetta eru stærstu nöfnin, þeir hafa verið á LIV-mótaröðinni, Ryder bikarnum og öllum stærstu sviðunum,“ sagði Hulda.

Guðbjörg Heiða Guðmundsdóttir, forstjóri Varðar var til viðtals í Bítinu á Bylgjunni ásamt Huldu Bjarnadóttir, forseta Golfsambands Íslands. Þær ræddu meðal annars Opna bandaríska og þátttöku Gunnlaugs þar, Regluvörðinn og almennt um golf. 

Viðtalið má heyra í spilaranum að ofan. 

Opna bandaríska meistaramótið verður í beinni útsendingu á Sýn Sport fimmtudag til sunnudags.