Vann í „ís­lensku veðri“ og fagnaði með ís með pabba

Hulda Clara gerðist atvinnukylfingur á síðasta ári og er nú þegar búin að vinna sitt fyrsta atvinnumannamót en það gerði hún með sigri á Czech Ladies Challenge í gær.

Hulda Clara lék á pari vallarins alla þrjá hringina en mótið fór fram í um 60 kílómetra fjarlægð frá Prag í Tékklandi.

Hún endaði höggi á undan hinni svissnesku Natalie Armbruester og tveimur höggum á undan Mou Svedenskiold frá Svíþjóð, eftir mikla spennu. Svo mikla raunar að Hulda Clara hélt að hún væri á leið í bráðabana gegn Armbruester, eftir að hafa fengið skolla á 16. holu.

„Ég hélt í fyrstu að ég væri bara með eins höggs forskot, og að við værum á leiðinni í umspil. En svo fattaði ég að ég hefði unnið og það var mjög gaman,“ sagði Hulda Clara á vef Let Access sem hélt haus og landaði fræknum sigri þrátt fyrir spennuna.

Aðeins Ragnheiður Kristinsdóttir hafði áður fyrst Íslendinga unnið mót á mótaröðinni, í fyrra, og Hulda Clara fetar nú í hennar fótspor.

„Þetta er nýliðatímabilið mitt. Ég er ánægð með hvernig ég spila og líður stórkostlega. Ég bjóst ekki alveg við þessu svona snemma en ég er mjög ánægð. Þetta tekur pressuna af manni fyrir næstu mót. Ég er mjög ánægð að hafa náð hingað,“ sagði Hulda Clara sem naut þess að spila í vindi og rigningu með köflum.

„Þetta eru ansi íslenskar veðuraðstæður. Ég vissi að ef ég yrði þolinmóð og myndi einbeita mér að hverju höggi þá myndi ég eiga góða möguleika,“ sagði Hulda Clara sem var þegar búin að ákveða hvernig hún ætlaði að fagna sigrinum.

„Ég er að fara til Prag með pabba mínum og flugið er ekki fyrr en á morgun, svo ég fæ mér eflaust einhverja dýrindis máltíð og svo ís til að fagna þessu.“