Phil Mickelson rekinn úr klúbbi fyrir að snerta konu ó­við­eig­andi

Golf Digest vitnar í margar heimildir sem segja að Mickelson sé ekki lengur velkominn í The Farms-golfklúbbinn í Rancho Santa Fe í Kaliforníu, þar sem sexfaldi risameistarinn hefur spilað og æft í áratugi. Óumbeðin snerting á að hafa átt sér stað fyrr í vor.

Mickelson, sem var aðalráðningaraðili við stofnun LIV Golf, hefur aðeins spilað einu sinni á þessu ári vegna alvarlegs heilsufarsvanda í fjölskyldunni sem ekki hefur verið greint frá. Hann spilaði ekki á Masters-mótinu og PGA-meistaramótinu og er ekki lengur með þátttökurétt á Opna bandaríska meistaramótinu.

Golf Digest sagðist hafa staðfest hver starfskona The Farms væri og að nafn hennar væri ekki birt til að vernda einkalíf hennar. Þar kom fram að hún hefði neitað að taka þátt í fréttaflutningnum.

Talsmaður Mickelsons sagði við Golf Digest: „Allur misskilningur hefur verið leiðréttur. Phil sinnir áfram heilsufarsvanda í fjölskyldunni og er óvíst hvenær hann getur snúið aftur í atvinnugolf.“

Golf Digest vitnaði í heimildir sem sögðu að Mickelson hefði nálgast konuna í klúbbhúsinu og snert hana á óviðeigandi hátt og án samþykkis. Konan hafnaði honum og tilkynnti atvikið til yfirmanna sinna.

Yfirmenn The Farms fóru yfir málið og rannsökuðu það, að því er Golf Digest greindi frá, og tóku síðan Mickelson tali á vellinum. Mickelson, sem er 55 ára, var sagt að yfirgefa svæðið.

The Farms, sem er staðsettur um 16 kílómetra frá Torrey Pines, er einkaklúbbur þar sem nokkrir af bestu kylfingum heims eru félagar, svo sem Annika Sörenstam og Xander Schauffele, sem eiga bæði aðalheimili í Flórída.