Hreyfing í við­ræðum Icelandair og flug­manna

„Það var farið yfir umfangsmiklar hugmyndir og tillögur um breytingar á kjarasamningi sem Icelandair hafði verið að vinna á undanförnum dögum. Það fór fram kynning á þessu og svona smá umræður en það hefur engin afstaða verið tekin til þessara tillagna enn þá,“ segir Ástráður Haraldsson ríkissáttasemjari í samtali við Vísi. 

FÍA muni kynna sér tillögurnar á næstu dögum og hann bindi vonir við að samninganefnd flugmanna leggi fram tillögur eða gagntilboð í kjölfarið. Ekki hefur enn verið boðað til nýs fundar í deilunni.

„FÍA-menn þurfa tóm til þess að skoða þessar hugmyndir, móta einhver viðbrögð og fá rými til þess allavega fram á morgundaginn. Við sjáum til hvað við þurfum mikinn tíma.“ 

Kjarasamningar FÍA og Icelandair hafa verið lausir frá því í september. Samningar við flugvirkja og flugþjóna eru sömuleiðis lausir og er búið að vísa kjaradeilu flugvirkja til ríkissáttasemjara.

Ekkert annað í boði en að semja

„Það er mín von að við séum allavega komin á ákveðna braut sem við gætum mögulega fetað einhvern veginn. En það er auðvitað alveg ómögulegt að segja um það enn þá, því það liggja ekki fyrir nein viðbrögð gagnaðilans,“ segir Ástráður.

„Ef hægt er að finna einhverja fleti sem að aðilarnir geta skipst á skoðunum um og eftir atvikum unnið áfram saman þá er það allavega svona skref í rétta átt. Það á svolítið eftir að koma í ljós.“

„Allavega þá held ég að öllum aðilum sé ljóst að það er auðvitað ekkert annað í boði heldur en að finna sameiginlega niðurstöðu.“

Ríkissáttasemjari hefur áður beint þeim tilmælum til fulltrúa Icelandair og flugmanna að forðast að tjá sig um stöðu viðræðna við fjölmiðla. 

Tekist á í fjölmiðlum

Icelandair hefur sakað flugmenn um að stunda óformlegar aðgerðir sem hafi leitt til þess að fella þurfti niður fjölda flugferða á síðustu vikum vegna manneklu. Formaður FÍA hefur hafnað þessum ásökunum. Stjórnendur Icelandair hafa greint frá því að flugmenn hafi skyndilega hætt að selja frídaga sína og hlaupa í skarðið þegar það vanti í áhafnir. 

Flugmaður hjá félaginu sagði í kjölfarið að það væri ekki við flugmenn að sakast að þeir vilji ekki selja frá sér kjarasamningsbundna frídaga. Álag hafi aukist og fleiri kosið að verja frídögum sínum frekar heima. Ekki væri hægt að byggja rekstur flugfélags á því að ganga á frídaga starfsmanna.

Nokkuð hefur verið fjallað um fjárhagsstöðu Icelandair en flugfélagið hefur skilað tugmilljarðatapi síðastliðin ár. Hörður Ægisson, ritstjóri Innherja, sagði í gær engan fjárfesti eða hluthafa vilja leggja meira fé til Icelandair fyrr en búið væri að skapa samkeppnishæft módel um rekstur félagsins. Hann sagði stöðu félagsins tvísýna og erfiða.

Inn í deiluna blandast einnig fyrirhuguð kaup Icelandair á hlut í Play Europe á Möltu og auknar heimildir til að leigja flugvélar með áhöfnum frá öðrum félögum. Þar er meðal annars horft til áhrifa á störf flugmanna og rekstur Icelandair. Formaður FÍA hefur sagt fyrirætlanir flugfélagsins gefa til kynna að það eigi að færa störf úr landi. 

Fréttin hefur verið uppfærð.