Tíu ára for­ritari upp­lýsir um markaðs­virði pókémonspila

Frumkvöðullinn ungi heitir Alexander Jósafat Hinriksson og segir ástæðu þess að hann ákvað að forrita vefsíðuna einfalda:

„Ég elska pókémon og svo ákvað ég að gera pókemonforrit því mér finnst smá gaman að gera forrit, þannig ég ákvað að gera pókémon forrit.“

Hvað gerir maður þegar maður er tíu ára og vill forrita, hvernig fer maður að því?

„Maður byrjar að skrifa á blað allt sem maður vill að forritið geti gert og svo gerir maður með gervigreindinni eitt í einu.“

Hann segir forritun ekki auðvelda en fékk dygga aðstoð frá föður sínum, Hinriki Jósafat Atlasyni, frumkvöðli. Vinna tók töluverðan tíma en afurðin er Trademon.tec. Þar geta notendur skráð spilin sín, athugað virði þeirra og boðið vinum að bítta spilum.

Rætt var við Hinrik á Vísi um helgina. Þar greidi hann meðal annars frá því að þeir feðgar væru nýkomnir heim af nýsköpunarviðburði sem haldinn var í Neskaupstað. Þar kynnti Alexander nýju vefsíðuna sína.

Áhersla á öryggi barna

„Hér er ég búin að senda Lamoc vinabeiðni og hér eru allir vinir mínir,“ sýnir Alexander fréttamanni.

Hugsað er fyrir öryggismálum á síðunni. Engar myndsendingar eru heimilar, ekkert spjall er í boði og hafa feðgarnir tryggt að ókunnugir finni ekki börn á síðunni. Þá geta börn einungis skipt spilum við raunverulega vini sína og er kóði sem tryggir að aðrir geti ekki haft samband.

Alexander hefur verið duglegur að safna spilum í gegnum tíðina.

„Ég á 178 kort en fleiri heima sem eru ekki á síðunni. Og þau eru öll virði 1526 dollara.“