Ef ég væri að spila gegn Liverpool myndi ég trúa á sigur

„Þetta var taktískur leikur. Hann var lokaður. Það var mikið slegist og hart barist í jöfnum leik. Þetta var örugglega ekki skemmtilegasti leikur sem áhorfendur hafa horft á. Það verður bara að hafa það fyrir áhorfendurna. Það er svona í þéttum 50/50 leik að hann er taktískur og hart barist eins og í öðrum leikjum,“ sagði Óskar Smári við Sýn Sport eftir leik.

Varnarleikur Stjörnunnar var sérlega góður og sóknarleikurinn var sömuleiðis góður þó mörkin hafi ekki orðið fleiri.

„Við hefðum alveg getað skorað fleiri mörk. Ég er ánægður með að vinna og halda hreinu. Ég tek það með mér á koddann í kvöld. Ég fer sáttur að sofa með það á bakinu. Við þurfum klárlega að gera betur í kringum teiginn.

Við þurfum að skapa meira afgerandi færi, mér finnst það vera svona það fyrsta. Við fáum fullt af stöðum, fáum einn á móti markmanni og ágætis upphlaup en við þurfum klárlega að verða betri á síðasta þriðjunginum,“ sagði hann.

Setjum stigin þrjú í pokann góða

Stundum er sagt að sigrar næri. Aðeins var um annan sigur Stjörnunnar í deildinni á tímabilinu og því væntir Óskar Smári þess að Stjörnufólk sé vel nært í kvöld.

„Við skulum vona það. Já, klárlega. Þetta er geggjaður sigur, að fara hérna á útivöll á móti jafngóðu liði og Þrótti og vinna iðnaðarsigur í rauninni er mjög kærkomið. Við höfum ekki verið að safna allt of mikið af stigum hérna í byrjun tímabils þannig að við tökum þessi stig og setjum þau í pokann góða og erum kát með það.“

Telur hann tilefni til bjartsýni en Óskar Smári kvaðst að lokum sérlega bjartsýnn að eðlisfari.

„Já, ég er alltaf bjartsýnn. Ég er svo mikill bjartsýnismaður að ef ég væri að fara að spila á móti Liverpool á morgun myndi ég halda að við myndum vinna!“